ສູນກາງແນວລາວສ້າງຊາດ

ສູນກາງແນວລາວສ້າງຊາດ
ຊື່ຫຍໍ້ ພາສາລາວ	ສນຊ
ຊື່ ພາສາອັງກິດ	Lao Front For National Development
ເວັບໄຊ	lfnd.gov.la

ແນວລາວສ້າງຊາດແມ່ນອົງການຈັດຕັ້ງສໍາພັນທາງການເມືອງຂອງທົ່ວສັງຄົມ, ເປັນສະຫະພັນຂອງອົງການຈັດຕັ້ງການເມືອງ, ອົງການຈັດຕັ້ງການເມືອງ-ສັງຄົມ, ອົງການຈັດຕັ້ງສັງຄົມ ແລະ ບຸກຄົນທີ່ເປັນຕົວແທນໃຫ້ແກ່ຊັ້ນຄົນ, ຊົນເຜົ່າ, ສາສະໜາ, ເພດ, ໄວ ລວມທັງຕົວແທນຄົນເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດ ບົນພື້ນຖານຄວາມຕື່ນຕົວ ແລະ ສະໝັກໃຈ.

ແນວລາວສ້າງຊາດເປັນພາກສ່ວນໜຶ່ງໃນລະບົບການເມືອງແຫ່ງ ສປປ ລາວ ໂດຍແມ່ນພັກປະຊາຊົນປະຕິວັດລາວເປັນແກ່ນນໍາ ແລະ ເປັນພື້ນຖານການເມືອງຂອງລະບອບປະຊາທິປະໄຕປະຊາຊົນ. ແນວລາວສ້າງຊາດ ສືບທອດ ແລະ ເສີມຂະຫຍາຍມູນເຊື້ອ ອັນສະຫງ່າລາສີ ຂອງແນວລາວອິດສະຫຼະ ແລະ ແນວລາວຮັກຊາດ ຊຶ່ງໄດ້ເຕົ້າໄຮມຄວາມສາມັກຄີ ປະຊາຊົນລາວບັນດາເຜົ່າ ເຂົ້າໃນການຕໍ່ສູ້ກູ້ຊາດ ໃນເມືອກ່ອນ ແລະ ການປົກປັກຮັກສາ ແລະ ສ້າງຊາດພັດທະນາປະເທດຊາດ ໃນປະຈຸບັນ.

ພາລະບົດບາດ

ແນວລາວສ້າງຊາດມີພາລະບົດບາດຕົ້ນຕໍດັ່ງນີ້:

1.    ເປັນຄັນທຸງ ເຕົ້າໂຮມຄວາມສາມັກຄີປອງດອງ ປະຊາຊົນລາວບັນດາເຜົ່າ, ສ້າງຄວາມເຂັ້ມແຂງ ແລະ ປັບປຸງກໍາລັງແຮງທົ່ວປວງຊົນ;

2.    ສຶກສາອົບຮົມ, ປຸກລະດົມ ປະຊາຊົນລາວບັນດາເຜົ່າ, ເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ;

3.    ເສີມຂະຫຍາຍສິດເປັນເຈົ້າ ໃນການປົກປັກຮັກສາວັດທະນະທໍາ, ຮີດຄອງປະເພນີອັນດີງາມ, ປົກປ້ອງສິດ ແລະ ຜົນປະໂຫຍດອັນຊອບທໍາ ຂອງປະຊາຊົນບັນດາເຜົ່າ ແລະ ຊັ້ນຄົນຕ່າງໆ.

4.    ໃກ້ຊິດຕິດແທດ, ເກັບກໍາຄໍາຄິດຄໍາເຫັນ, ສ່ອງແສງມານະຈິດ ແລະ ຄວາມມຸ່ງມາດປາຖະໜາ ຂອງປະຊາຊົນລາວບັນດາເຜົ່າ.

5.    ຕິດຕາມ ກວດກາ ການເຄື່ອນໄຫວ ຂອງອົງການອໍານາດລັດ ແລະ ພາຄີຂອງແນວລາວສ້າງຊາດ ໂດຍຜ່ານຄໍາເຫັນຂອງປະຊາຊົນລາວບັນດາເຜົ່າ.

6.    ເປັນໃຈກາງປະສານສົມທົບ ກັບພາຄີຂອງຕົນ.

ສິດ ແລະ ໜ້າທີ່ ຂອງແນວລາວສ້າງຊາດ

1. ເຕົ້າໂຮມຄວາມສາມັກປະຊາຊົນລາວບັນດາເຜົ່າ ທັງຢູ່ພາຍໃນ ແລະ ຕ່າງປະເທດ:

2. ຜັນຂະຫຍາຍແນວທາງ, ນະໂຍບາຍ, ລັດຖະທຳມະນູນ, ກົດໝາຍ ເປັນແຜນການ, ແຜນງານ, ໂຄງການ ແລະ ຈັດຕັ້ງປະຕິບັດ;

3. ສະເໜີສ້າງກົດໝາຍ ແລະ ນິຕິກຳອື່ນ ຕາມພາລະບົດບາດ ແລະ ຄວາມຮັບຜິດຊອບຂອງຕົນ;

4. ໂຄສະນາ, ສຶກສາອົບຮົມ, ປຸກລະດົມ, ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ ໃນການປະຕິບັດແນວທາງ, ນະໂຍບາຍ, ລັດຖະທໍາ ມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ;

5. ຕິດຕາມ-ກວດກາ ການເຄື່ອນໄຫວຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ສະມາຊິກສະພາດັ່ງກ່າວ, ອົງການບໍລິຫານ, ສານປະຊາຊົນ, ອົງ ການໄອຍະການປະຊາຊົນ, ພະນັກງານ-ລັດຖະກອນ ຕາມການສະເໜີຂອງປະຊາຊົນລາວບັນດາເຜົ່າ, ຊັ້ນຄົນ, ສາສະໜາ, ເພດ, ໄວ ເພື່ອສະເໜີຕໍ່ ອົງການຈັດຕັ້ງທີ່ກ່ຽວຂ້ອງ ພິຈາລະນາແກ້ໄຂ;

6. ເຂົ້າຮ່ວມການປັບປຸງ, ບູລະນະອໍານາດລັດປະຊາທິປະໄຕປະຊາຊົນ;

7. ປົກປ້ອງສິດ ແລະ ຜົນປະໂຫຍດອັນຊອບທຳຂອງຕົນ, ພາຄີ, ປະຊາຊົນລາວບັນດາເຜົ່າ ແລະ ເຂົ້າຮ່ວມການແກ້ໄຂຂໍ້ຂັດແຍ່ງ ຕາມພາລະບົດບາດ ຂອງຕົນ;

8. ປະກອບສ່ວນ ປົກປັກຮັກສາ, ເສີມຂະຫຍາຍມູນເຊື້ອຮັກຊາດ, ວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ແລະ ຊົນເຜົ່າ;

9. ຖ່າຍທອດຄວາມຮູ້, ບົດຮຽນ, ປະສົບການ ແລະ ມູນເຊື້ອອັນດີງາມ ຂອງແນວລາວອິດສະຫຼະ, ແນວລາວຮັກຊາດ ໃຫ້ແກ່ຄົນຮຸ່ນຫຼັງ:

10. ສະເໜີບຸກຄະລາກອນຂອງຕົນ, ປະກອບຄໍາເຫັນຕໍ່ບຸກຄະລາກອນຂອງພາກສ່ວນອື່ນ ທີ່ເປັນຕົວແທນຂອງປະຊາຊົນບັນດາເຜົ່າ ອອກສະໝັກຮັບເລືອກ ຕັ້ງເຂົ້າໃນອົງການຈັດຕັ້ງການເມືອງ, ສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ອົງການຈັດຕັ້ງອື່ນ ຕາມລະບຽບການ;

11. ປະສານສົມທົບກັບພາກສ່ວນທີ່ກ່ຽວຂ້ອງກ່ຽວກັບການເຄື່ອນໄຫວວຽກງານແນວໂຮມ;

12. ເສີມຂະຫຍາຍການທູດປະຊາຊົນ, ສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນບັນດາເຜົ່າ ກັບປະຊາຊົນບັນດາປະເທດໃນພາກ ພື້ນ ແລະ ສາກົນ:

13. ສະຫຼຸບ, ລາຍງງານ ການເຄື່ອນໄຫວກ່ຽວກັບວຽກງານແນວລາວສ້າງຊາດ ຕໍ່ຂັ້ນເທິງຢ່າງເປັນປົກກະຕິ:

14. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ.

ໂຄງຮ່າງການຈັດຕັ້ງ

• ຫ້ອງການ
• ກົມຈັດຕັ້ງພະນັກງານ
• ກົມກວດກາ
• ກົມໂຄສະນາ – ອົບຮົມ
• ກົມຊົນເຜົ່າ
• ກົມສາສະໜາ
• ກົມຊັ້ນຄົນ ແລະ ອົງການຈັດຕັ້ງທາງສັງຄົມ
• ສູນຝຶກອົບຮົມ ແນວລາວສ້າງຊາດ

ແຫຼ່ງທີ່ມາ: https://lfnd.gov.la/