ທົ່ງໄຫຫີນ1
ຕັ້ງຢູ່ທາງທິດຕາເວັນຕົກສ່ຽງເໜືອ ຂອງຕົວ ເມືອງໂພນສະຫວັນ ປະມານ 8 ກິໂລແມັດ, ໃນນັ້ນ ປະກອບດ້ວຍໄຫຫີນທັງໝົດ 334 ໜ່ວຍ, ຈາກການປະເມີນທາງດ້ານນ້ຳໜັກ ແລະ ວັດຮອບຕົວຈິງ ຂອງອົງການ UNESCO ແລ້ວເຫັນວ່າໄຫຫີນໜ່ວຍທີ່ໃຫຍ່ກ່ວາໝູ່ມີນ້ຳໜັກຫຼາຍກ່ວາ 10.000 ກິໂລກຣາມ ແລະ ມີວັດຮອບໄດ້ 8.14 ແມັດ, ບັນຫາດັ່ງກ່າວ ຈຶ່ງເປັນທີ່ໜ້າສົນໃຈວ່າ: ໃນຍຸກ 2500-3000 ປີ ທີ່ຜ່ານມາ (ປີທີ່ໄຫຫີນຖືກສ້າງຂຶ້ນ) (Miss Coloni, 1930-1935), ກ່ອນບໍ່ທັນມີກົນຈັກທີ່ທັນສະໄໝ ຈຶ່ງໜ້າຕັ້ງຂໍ້ສັງເກດວ່າ: ຄົນສະໄໝກ່ອນຂົນຍ້າຍໄຫຫີນດ້ວຍວິທີໃດ ຈາກບ່ອນຜະລິດໄຫຫີນ (ພູເກັງ) ທີ່ມີໄລຍະທາງເກືອບ 10 ກິໂລແມັດ. ພາຍໃນທົ່ງໄຫ ຍັງມີຖ້ຳ ທີ່ມີຄວາມລຶກລັບທາງດ້ານປະຫວັດສາດອີກຫຼາຍຢ່າງ ທີ່ໜ້າສຶກສາ. ສະຖານທີ່ທ່ອງທ່ຽວທົ່ງໄຫຫີນ 1 ນີ້ ຍັງມີບາງສິ່ງທີ່ຈະຕ້ອງໄດ້ປັບປຸງແກ້ໄຂເຊັ່ນ: ຈັດສັນໃໝ່, ສ້າງຫ້ອງຂໍ້ມູນ, ສ້າງຕະຫຼາດຂາຍເຄື່ອງຂອງປະຊາຊົນທ້ອງຖິ່ນ ເປັນຕົ້ນແມ່ນ ຂາຍເຄື່ອງທີ່ລະນຶກໃຫ້ແກ່ນັກທ່ອງທ່ຽວ, ສ້າງເຮືອນຂາຍປີ້ໃໝ່ ແລະ ສິ່ງອຳນວຍຄວາມສະດວກອື່ນໆ.
http://www.laogov.gov.la/province/Pages/Provincetourism.aspx?CateID=4&MenuID=6&ItemID=456