ທະນາຄານແຫ່ງ ສປປ ລາວ

ທະນາຄານແຫ່ງ ສປປ ລາວ ແມ່ນ ອົງການລັດທຽບເທົ່າກະຊວງ ຊຶ່ງສັງກັດໃນໂຄງປະກອບກົງຈັກຂອງລັດຖະບານ, ມີຖານະເປັນ ນິຕິບຸກຄົນ

ພາລະບົດບາດ

ທະນາຄານແຫ່ງ ສປປ ລາວ ມີພາລະບົດບາດເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກທາງດ້ານເງິນຕາ ໃຫ້ມີ ສະຖຽນລະພາບ, ຄຸ້ມຄອງສະຖາບັນການເງິນ ໃຫ້ມີຄວາມໝັ້ນຄົງ ແລະ ຄຸ້ມຄອງລະບົບການຊຳລະໃຫ້ມີປະສິດທິພາບ ເພື່ອຊຸກຍູ້ການ ພັດທະນາເສດຖະກິດ-ສັງຄົມຂອງຊາດ

ໜ້າທີ່

ທະນາຄານແຫ່ງ ສປປ ລາວ ມີໜ້າທີ່ດັ່ງນີ້:

ຄົ້ນຄວ້າ ສ້າງ ນະໂຍບາຍ ແລະ ຍຸດທະສາດ ເພື່ອສະເໜີລັດຖະບານພິຈາລະນາ;

ຜັນຂະຫຍາຍ ນະໂຍບາຍ ແລະ ຍຸດທະສາດ ເປັນແຜນງານ, ແຜນການ ແລະ ໂຄງການລະອຽດ ຂອງທະນາຄານແຫ່ງ ສປປ ລາວ ແລະ ຈັດຕັ້ງປະຕິບັດ ;

ສ້າງ ແລະ ປັບປຸງກົດໝາຍ, ລັດຖະບັນຍັດ ແລະ ດໍາລັດ ເພື່ອສະເໜີລັດຖະບານ ພິຈາລະນາ;

ປະຕິບັດນະໂຍບາຍເງິນຕາ ດ້ວຍການນໍາໃຊ້ເຄື່ອງມືນະໂຍບາຍເງິນຕາໃຫ້ສອດຄ່ອງກັບສະພາບການໃນແຕ່ລະໄລຍະ;

ຄຸ້ມຄອງເງິນຕາຕ່າງປະເທດ ໃຫ້ສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ;

ຮັກສາ ແລະ ຄຸ້ມຄອງ ຄັງສຳຮອງເງິນຕາຕ່າງປະເທດ;

ຄຸ້ມຄອງ ແລະ ຕິດຕາມກວດກາ ການເຄື່ອນໄຫວວຽກງານຂອງສະຖາບັນການເງິນ;

ຄຸ້ມຄອງ ແລະ ຕິດຕາມກວດກາ ເຄື່ອງມື, ລະບົບກົນໄກການຊຳລະ ໃຫ້ມີຄວາມປອດໄພ;